ජාත්‍යන්තර ක්ෂමා ආයතනයෙන් ශ්‍රී ලංකාව ගැන භයානක අනතුරු ඇඟවීමක්

කුසගින්න, මන්දපෝෂණය සහ ගැඹුරු දරිද්‍රතාවයේ අද්දරට තල්ලු වෙමින් සිටින ශ්‍රී ලංකාවේ මිනිසුන්ට සෞඛ්‍ය සේවා සඳහා ප්‍රවේශය නැති තරම් බව ජාත්‍යන්තර ක්ෂමා ආයතනය පවසයි.

එම ආයතනය විසින් ඊයේ (04) නිකුත් කරන ලද නවතම වාර්තාවේ මේ බව සඳහන් කර ඇත.

පිටු 57කින් සමන්විත එම වාර්තාවේ දැක්වෙන්නේ, නුදුරේදීම ශ්‍රී ලංකාව සම්පූර්ණයෙන් කඩාවැටීමට ආසන්න බවය.

ආර්ථික අර්බුදය තුළ සෞඛ්‍ය, ආහාර සහ සමාජ ආරක්ෂණ අයිතිවාසිකම් ආරක්ෂා කිරීම, මෙරට ජනතාවගේ මානව හිමිකම් කෙරෙහි ආර්ථික හා සමාජ අර්බුදයේ ව්‍යසනකාරී බලපෑම පෙන්නුම් කරන බව එහි සඳහන් කර තිබේ.

ජාත්‍යන්තර ආධාර ප්‍රමාණය වැඩි කිරීම, පුළුල් සමාජ ආරක්ෂණය සහතික කිරීම සහ ණය සහන සඳහා ඇති සියලු විකල්ප සලකා බැලීම වැනි තත්ත්වවලට ප්‍රතිචාර දැක්වීමේදී මානව හිමිකම් ආරක්ෂා කිරීම සඳහා ශ්‍රී ලංකාවේ නායකයින් සහ ජාත්‍යන්තර ප්‍රජාව ක්‍රියාත්මක කළ යුතු ප්‍රතිසාධන ක්‍රියාමාර්ග එම වාර්තාව මගින් විස්තර කර ඇත.

මෙම වසරේ ජූනි සහ සැප්තැම්බර් මාස තුළ විවිධ සමාජ තලයන්හි ජීවත් වන පුද්ගලයින් 55 දෙනෙකු සමග කළ සම්මුඛ සාකච්ඡා පදනම් කරගෙන අදාළ වාර්තාව සකස් කර තිබේ.

එහිදී ස්ථිර රැකියාවක් නොමැති පුද්ගලයින්, කම්කරුවන්, ධීවර, වතු සේවකයින් ආදී සමාජයේ දැඩි බලපෑමකට ලක්වන්නන් යොදා ගෙන ඇත.

ශ්‍රී ලංකා රජය, පරිත්‍යාගශීලී රටවල් සහ ජාත්‍යන්තර මූල්‍ය ආයතන මෙරට ආර්ථික අර්බුදය විසඳීම සඳහා වැඩසටහන් සහ ආර්ථික ප්‍රතිසංස්කරණ ක්‍රියාත්මක කිරීමේ ක්‍රියාවලියක යෙදී සිටින බව අදාළ වාර්තා වේ දැක්වේ.

එම ක්‍රියාවලියේදී සියලු ම ආධාර ගිවිසුම්වල සෞඛ්‍ය සහ ප්‍රමාණවත් ආහාර සඳහා ඇති අයිතිවාසිකම් ආරක්ෂා කිරීම මගින් ජාත්‍යන්තර මානව හිමිකම් නීතිය යටතේ ඔවුන්ගේ බැඳීම් සපුරාලීම සහතික කරන ලෙස ජාත්‍යන්තර ක්ෂමා ආයතනය මෙම ආයතනවලින් ඉල්ලා තිබේ.

එමෙන් ම, ආර්ථික ප්‍රතිසංස්කරණ ක්‍රියාත්මක කිරීමට පෙර ශ්‍රී ලංකා රජය සහ ජාත්‍යන්තර මූල්‍ය ආයතන මානව හිමිකම් බලපෑම් තක්සේරු කිරීම් සිදු කළ යුතු බවට ද එම ආයතනය අවධාරණය කර තිබේ.

කෙසේ වෙතත්, ජාත්‍යන්තර ක්ෂමා ආයතනය සිය වාර්තාව මගින් පෙන්වා දී ඇත්තේ එම පියවර ගෙන තිබේ ද? නැද්ද? යන්න තවමත් අපැහැදිලි බව ය.

එමන් ම, ජාත්‍යන්තර ණය ප්‍රතිව්‍යුහගත කිරීමේදී ණය හිමියන් සමග ඇති කර ගන්නා ඕනෑ ම ණය සහන ගිවිසුමක් මානව හිමිකම් බැඳීම් ඉටු කිරීමට ශ්‍රී ලංකාවට ඇති හැකියාව අඩපණ නොකළ යුතු බව ද එහි සඳහන් කර ඇත.

අදාළ වාර්තාවෙන් පෙන්වා දෙන්නේ, දශක කිහිපයක් තිස්සේ පැවති රාජ්‍ය ප්‍රතිපත්ති පමණක් නොව, සංචාරක කර්මාන්තය ආශ්‍රිත අත්‍යවශ්‍ය ආදායම් මූලාශ්‍ර අහිමි කරමින් රටේ ආර්ථිකයට බරපතළ ලෙස බලපෑ කොවිඩ්-19 වසංගතය සහ විදෙස් ශ්‍රමිකයින්ගේ ප්‍රේෂණ අහිමි වීම ශ්‍රී ලංකාවේ ආර්ථික අර්බුදය ඇති වීමට හේතු වී ඇති බව ය.

ජාත්‍යන්තර ක්ෂමා ආයතනයේ ආර්ථික, සමාජීය සහ සංස්කෘතික අයිතිවාසිකම් පිළිබඳ පර්යේෂක සංහිතා අම්බස්ට් මේ සම්බන්ධයෙන් අදහස් දක්වමින් ප්‍රකාශ කර ඇත්තේ, ජනතාවගේ අයිතිවාසිකම් කුරිරු ලෙස උදුරා දැමූ මෙම අර්බුදයේ පුලුල්ව පැතිරී ඇති මානව හිමිකම් කඩවීම් අවම කිරීමට ශ්‍රී ලංකා බලධාරීන් සහ ජාත්‍යන්තර ප්‍රජාව ඉක්මනින් ක්‍රියා කළ යුතු බව ය.