ප්‍රබල ඇමතිවරයෙකුගේ ආරක්ෂකයෙකු පොලිස් යුවතියන් නාන අයුරු හොරෙන් බලා මට්ටුවෙයි...

පොලිස් කාන්තා නිලධාරීනියන් නාන අයුරු එහි වහලයේ තහඩුවක් ඉවත් කර බලමින් සිටි බව කියන පොලිස් සැරයන්වරයකු සැකපිට අත් අඩංගුවට ගත් බවත් ඔහු ප්‍රබල ඇමතිවරයෙකුගේ ආරක්ෂකයෙකු බවත් කුරුඳුවත්ත පොලිසිය කියයි.

ඔහු අත්අඩංගුවට ගෙන ඇත්තේ කොළඹ 07 මලලසේකර මාවතේ පිහිටි පොලිස් සංස්කෘතික කොට්ඨාසයට අනුයුක්තව සේවය කරන කාන්තා නිලධාරිනියන් නවාතැන් ගෙන සිටින භට නිවසේ ඇති නාන කාමරයේ වහලයට සවිකර තිබූ තහඩුවක් ඉවත්කර නිලධාරිනියන් කිහිප දෙනකු නාන අයුරු බලමින් සිටියදීය.

කාන්තා භට නිවස සමීපයේ ඇති තාප්පයට ගොඩවී ඔහු නාන කාමරයේ වහලයට නැග ඇතැයි පොලිසිය කියයි. සැකකරු දුටු පොලිස් නිලධාරිනියන් කිහිපදෙනකු මේ බව පොලිස් නිලධාරින්ට පැවැසීමෙන් අනතුරුව එම පොලිස් නිලධාරින් ඔහු අල්ලා ගැනීමට යාමේ දී පලාගොස් තිබේ. පොලිස් කණ්ඩායම ලුහුබැඳ ගොස් ටොරින්ටන් මාවතේ දී ඔහු සිය ග්‍රහනයට ගෙන කුරුඳුවත්ත පොලිසියට භාරදී ඇත.

සැකකරු පොලිස් සැරයන්වරයකු බව හෙළිවී ඇත්තේ ඔහු අත්අඩංගුවට ගෙන කරන ලද ප්‍රශ්න කිරීම්වලදීය. තමන් ප්‍රභූ ආරක්ෂක අංශයක රාජකාරි කරන පොලිස් සැරයන්වරයකු බවත් තමන් ප්‍රබල ඇමැතිවරයකුගේ ආරක්ෂාවට යොදවා සිටින අයකු බවත් ප්‍රශ්න කිරීම්වලදී අනාවරණය වී තිබේ.