ගරාජයේ සිට මුළු විශ්වයටම ගිය Google 24වෙනි උපන්දිනය සමරයි

මේ වනවිට ලොව ඇති ප්‍රමුඛතම අන්තර්ජාලය සම්බන්ධ මෙවලම් සහ සේවා සපයන්නා වන Google සමාගම විධිමත් සමාගමක් ලෙස ආරම්භ වී ඇත්තේ 1998 සැප්තැම්බර් 04 වෙනිදාය. එනම් ඊයේ (04) වැනි දිනකදී වීම විශේෂත්වයකි.

එහි පළමු කාර්යාලය ආරම්භ වුණේ, ඇමෙරිකාවේ, කැලිෆෝනියා ප්‍රාන්තයේ, මෙන්ලෝ උද්‍යානයේ පිහිටි ගරාජයක් තුළයි.

ලැරී පේජ් සහ සර්ජි බ්‍රින් ස්ටැන්ෆර්ඩ් විශ්වවිද්‍යාලයේ ආචාර්ය උපාධිය හදාරමින් සිටි සමයේ පර්යේෂණ ව්‍යාපෘතියක් ලෙස ආරම්භ කළ Google පළමුව එළිදැක්වූනේ අන්තර්ජාල සෙවුම් යෙදවුමක් ලෙසයි.

පසුව ඉන් නොනැවති, Google හා අනුබද්ධ යෙදවුම් සහ සේවා නිර්මාණය කළ ඔවුන් මේ වනවිට ලොව ප්‍රමුඛතම අන්තර්ජාලය හා සම්බන්ධ ව්‍යාපාරික ආයතනය බවට පත්ව සිටී.

2015 වසරේ දි Google සමාගම තුළ ප්‍රතිව්‍යුහගතකරණයේ ප්‍රතිඵලයක් ලෙස Alphabet Inc නමින් මව් සමාගමක් හා ඊට අනුබද්ධ තවත් සමාගම් කිහිපයකට වෙන්කෙරිණි.

වර්තමානයේ අමෙරිකාවේ කැලිෆෝනියා ප්‍රාන්තයේ Mountain view හි පිහිටි Google සමාගමේ මූලස්ථානය Googleplex ලෙස හඳුන්වනු ලබයි.

මේ වනවිට ගූගල් මව් සමාගම වන Alphabet Inc තුළ සේවය කරන වෘත්තීකයන් සංඛ්‍යාව 156,000 ඉක්මවති.